Na actualidade 13 países da U.E. xa permiten as 44 toneladas de carga nos vehículos de transporte de mercadorías nos tráficos internos. En troques, o adianto das eleccións (ao 23 de xullo de 2023) paralizou en España a aprobación da ampliación de pesos este verán.
A Comisión Europea traballa nunha Directiva que, ademais de autorizar as 44 Tn en transporte internacional, tamén permitirá o tráfico transfronteirizo de megacamións.
Proposta de nova Directiva de Pesos e Dimensións
Acaba de facerse pública a proposta da Comisión Europea de modificar a actual Directiva Europea sobre pesos e dimensións dos vehículos de transporte, como parte da Estratexia Europea de Mobilidade Sostible. A finalidade é limitar os impactos negativos ao medio ambiente, xa que supostamente o 28% dos gases de efecto invernadoiro e o 34% das emisións de óxidos de nitróxeno provén dos vehículos de transporte por estrada.
Fenadismer ven de desvelar que o Director Xeral de Transportes Terrestres da Comisión Europea, nunha carta remitida ao Presidente desta Federación, lle comunicou que o obxectivo principal que persegue a Directiva:
“é impulsar a adopción de vehículos pesados de cero emisións e promover a compatibilidade modal e a cooperación, mediante fortes incentivos, incluída a carga útil adicional, para que os operadores reverdezan as súas frotas ou participen en operacións intermodais”.
O que se pretende é atender ás presións dos grandes grupos de distribución e dos operadores loxísticos para autorizar, de forma automática, o transporte transfronteirizo de vehículos máis pesados ou máis largos entre os Estados membros veciños. O que permitiría harmonizar os pesos e as dimensións máximos cos límites máis comúns permitidos actualmente. Isto é, o incremento do peso máximo ata 44 toneladas, como xa se permite en 13 estados membros, pero fomentando os vehículos cero emisións, así como o transporte transfronteirizo dos vehículos euromodulares (megacamións) de ata 25,25 metros de lonxitude e 60 toneladas.
O incremento de pesos e dimensións para o 2023 en España, provisionalmente parado
Se ben a tramitación e aprobación final desta nova Directiva Europea se alargará cando menos 2 anos, hai que dicir tamén que o Ministerio de Transportes español xa viña traballando nos últimos meses nun borrador bastante avanzado para modificar a nivel estatal a regulación dos pesos e dimensións dos vehículos de transporte. Co obxectivo evidente de introducir as 44 toneladas na frota de transporte española e a simplificación dos requisitos para a autorización e circulación dos megacamións e os duotrailers. Sen embargo, o adianto electoral (23J 2023) impediu a súa aprobación definitiva, polo que haberá que esperar á conformación do novo Goberno que saia das urnas para continuar a tramitación de dita norma.
Sede Porriño
